Monday, June 29, 2015

कृषिदुत व कृषिकन्‍यांनी शेतक-यांसाठी कार्य करावे........ प्राचार्य डॉ डि एन गोखले


ग्रामीण कृषि कार्यानुभव कार्यक्रमाच्‍या माध्‍यमातुन शेतक-यांच्‍या जीवनपध्‍दतीचा अभ्‍यास करण्‍याची संधी कृषिच्‍या विद्यार्थ्‍यांना असुन कृषिदुत व कृषिकन्‍या यांनी शेतक-यांसाठी कार्य करावे, असे प्रतिपादन कृषि महाविद्यालयाचे प्राचार्य डॉ डि एन गोखले यांनी केले. वसंतराव नाईक मराठवाडा कृषि विद्यापीठातंर्गत असलेल्‍या परभणी येथील कृषि महावि‍द्यालयाच्‍या कृषि पदवी अभ्‍यासक्रमाच्‍या सातव्‍या सत्रात ग्रामीण कृषि कार्यानुभव कार्यक्रम (रावेअसतो. हा कार्यक्रम राबविण्‍यांसाठी कृषिदुत व कृषिकन्‍यांसाठी उद्बोधन कार्यक्रमाचे आयोजन दि. २२ जुन रोजी करण्‍यात आले होते. कार्यक्रमाच्‍या अध्‍यक्षस्‍थानावरून ते बोलत होते, व्‍यासपीठावर रावे समन्‍वयक डॉ राकेश आहिरे, कोरडवाहु संशोधन केंद्राचे प्रभारी अधिकारी डॉ बी व्‍ही आसेवार, करडई संशोधन केंद्राचे प्रभारी अधिकारी डॉ एस बी घुगे यांच्‍यासह विविध विषयतज्ञ उपस्थित होते.

प्राचार्य डॉ डि एन गोखले पुढे म्‍हणाले की, कृषि महाविद्यालयातील विद्यार्थ्‍यांनी ग्रामीण कृषि कार्यानुभवाच्‍या माध्‍यमातुन ग्रामीण जीवनपध्‍दतीचा अभ्‍यास करावा व विद्यापीठाचे कृषि तंत्रज्ञान प्रात्‍यक्षिके, कृषि मेळावे आदींच्‍या माध्‍यमातुन शेतक-यांपर्यंत पोहचवावे, असा सल्‍लाही त्‍यांनी दिला.  
कार्यक्रमात विषयतज्ञ डॉ अनिल धमक, प्रा ए बी बांगडे, प्रा ए एम कांबळे, प्रा रणजित चव्‍हाण, प्रा विशाल अवसरमल, प्रा पी एच घंटे, प्रा डि व्‍ही बैनवाड, प्रा भेदे यांनी विद्यार्थ्‍यांना विविध विषयावर मार्गदर्शन केले. कार्यक्रमाचे प्रास्‍ताविक रावेचे समन्‍वयक डॉ राकेश आहिरे यांनी तर सुत्रसंचालन रावेचे प्रभारी अधिकारी डॉ प्रविण कापसे यांनी केले. या उद्बोधन कार्यक्रमास कार्यक्रमाधिकारी डॉ डि व्‍ही दळवी, डॉ आर सी महाजन, डॉ जयश्री एकाळे, प्रा ए आर मंत्री, प्रा सुनिता पवार, प्रा एस एस गलांडे, डॉ यु एन क-हाड यांच्‍यासह कृषिदुत व कृषिकन्‍या मोठया संख्‍येने उपस्थित होते.  

कृषि पदवी अभ्‍यासक्रमाच्‍या सातव्‍या सत्रात ग्रामीण कृषि कार्यानुभव कार्यक्रम (रावे) असुन या सत्रात प्रत्‍यक्ष शेतक-यांचे शेती कासण्‍याचे तंत्र व ग्रामीण जीवनपध्‍दतीचा ते अभ्‍यास करतात. या सत्रातील विद्यार्थ्‍यांना कृषिदुत व कृषिकन्‍या संबोधन्‍यात येते. यावर्षी कृषि महाविद्यालयातील १९२ विद्यार्थ्‍यी कृषिदुत व कृषिकन्‍या म्‍हणुन पुढील पंधरा आठवडे परभणी तालुक्‍यातील निवडक दहा गांवात कार्य करणार आहेत. 

Sunday, June 28, 2015

अंबाजोगाई येथील कृषि महाविद्यालयाच्‍या कृषिदुतांनी केला कृषि तंत्रज्ञानाचा जागर

वसंतराव नाईक मराठवाडा कृषि विद्यापीठांतर्गत असलेल्‍या अंबाजोगाई येथील कृषि महाविद्यालयाच्‍या ग्रामीण कृषि कार्यानुभव कार्यक्रमांर्गत कृषिदुतांनी अंबाजोगाई तालुक्‍यातील डिघोळअंबा व सनगांव गावात प्रभातफेरी काढुण गावातील शेतक-यांत कृषि तंत्रज्ञानाबाबत जनजागृती करण्‍यात आली. तसेच गाजरगवत निर्मुलन व आरोग्‍यासाठी योगा कार्यक्रमही राबविण्‍यात आला. या विविध कार्यक्रमाचे आयोजन प्राचार्य डॉ पी एन करंजीकर यांच्‍या मार्गदर्शनाखाली कार्यक्रमाधिकारी डॉ एस जी पुरी व कृषिदुत यांनी केले. कार्यक्रमासाठी शाळेचे मुख्‍याध्‍यापक श्री मेनकुदळे, श्री एकुरकेसर, श्री म्‍हेत्रे, श्रीमती देशमुख, श्रीमती चिमटे, श्री पाथरकर, श्री चव्‍हाण, श्रीमती अंबुरे, श्रीमती शिंदे आदींचे सहकार्य लाभले.

Tuesday, June 23, 2015

कृषि विद्यापीठ व कृषि विभागाने समन्वयाने विस्तार कार्य करावे ......प्रभारी कुलगुरू मा डॉ अशोक ढवण

क्रॉपसॅप प्रकल्‍पांतर्गत आयोजीत दोन दिवसीय प्रशिक्षणाचे उद्घाटन
शेतक-यांसाठी कृषि विद्यापीठाने पर्यावरणाच्‍या दृष्‍टीने सुरक्षित व कमी खर्चाचे तंत्रज्ञान विकसित केले असुन त्‍याच्‍या विस्‍तारासाठी कृषि विभाग व कृषि विद्यापीठ यांनी समन्‍वयाने कार्य करावे, या विस्‍तार कार्यात सातत्‍य असावे, असे प्रतिपादन वसंतराव नाईक मराठवाडा कृषि विद्यापीठाचे प्रभारी कुलगुरू मा डॉ अशोक ढवण यांनी केले.
वसंतराव नाईक मराठवाडा कृषि विद्यापीठातील किटकशास्‍त्र विभाग व महाराष्‍ट्र शासनाचा कृषि विभाग यांच्‍या संयुक्‍त विद्यमाने सोयाबीन, कापुस, तुर व हरभरा पिकावरील कीड-रोग सर्वेक्षण व सल्‍ला (क्रॉपसॅप) प्रकल्‍पांतर्गत दि २३ व २४ जुन रोजी कृषि विभागातील अधिकारी, कर्मचारी व कृषि विद्यापीठातील जिल्‍हास्‍तरीय समन्‍वयक यांचे दोन दिवसीय प्रशिक्षणाच्‍या उद्घाटनाप्रसंगी ते बोलत होते. व्‍यासपीठावर संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ बी बी भोसले, जिल्‍हा अधिक्षक कृषि अधिकारी श्री साहेबराव दिवेकर, विभाग प्रमुख डॉ पी आर झंवर यांची प्रमुख उपस्थिती होती.
प्रभारी कुलगुरू मा डॉ अशोक ढवण पुढे म्‍हणाले की, पिकांमधील विविध कीड व रोगाच्‍या प्रादुर्भावाबाबत पुर्वानुमान काढुण त्‍याबाबत शेतक-यांपर्यंत योग्‍य वेळी उपाय योजनाबाबत सल्‍ला पोहचविल्‍यास पीकांचे होणारे मोठे नुकसान टाळता येऊ शकते. याबाबत क्रॉपसॅप प्रकल्‍प निश्चितच यशस्‍वी ठरला आहे.
संशोधन संचालक डॉ दत्‍तप्रसाद वासकर आपल्‍या मार्गदर्शनात म्‍हणाले की, कृषि विभागाने विद्यापीठ विकसित तंत्रज्ञानाबाबताचे शेतक-यांचे अनुभव व तंत्रज्ञान अवलंबतांना येणा-या अडचणी विद्यापीठास वेळोवेळी कळवाव्‍यात जेणेकरून कृषि शास्‍त्रज्ञ त्‍यादृष्टिने संशोधन करतील. विस्‍तार शिक्षण संचालक डॉ बी बी भोसले म्‍हणाले की, क्रॉपसॅप प्रकल्‍पातील किड व रोगाबाबत सल्‍लामुळे मोठया प्रमाणावर शेतक-यांचा फायदा झाला असुन देश व राज्‍य पातळीवरील अनेक पारितोषिके या प्रकल्‍पास प्राप्‍त झाले आहेत. गेल्‍या वर्षी मराठवाडयातील साधारणत: १४४ गावे ही किड व रोग जास्‍त संवेदनशील असल्‍याचे आढळुन आले असुन यावर्षी या गावांवर जास्‍त लक्ष देण्‍यात येणार आहे. यावेळी कृषि उपसंचालक श्रीमती आर जी शिंदे यांनीही मनोगत व्‍यक्‍त केले.
प्रास्‍ताविकात विभाग प्रमुख डॉ पी आर झंवर यांनी क्रॉपसॅप प्रकल्‍पाची माहिती देतांना सांगितले की, सोयाबीन पिकासाठी २९ सप्‍टेबर पर्यंत व कापुस पिकासाठी १३ नोब्‍हेंबर पर्यंत सल्‍ला देण्‍यात येणार आहे. कार्यक्रमाचे सुत्रसंचालन डॉ द्यानंद मोरे यांनी तर आभार प्रदर्शन तालुका कृषि अधिकारी बी आर काकडे यांनी केले. याप्रकल्‍पातंर्गत मराठवाडयात साधारणत: बारा हजार हेक्‍टर साठी एक किड सर्व्‍हेक्षक कार्य करणार असुन एकुण २४४ किड सर्व्‍हेक्षक कार्यरत राहणार आहे. दर आठवड्या दोन वेळा शेतक-यांना विविध माध्‍यमाव्‍दारे सल्‍ला देण्‍यात येणार आहे. हा सल्‍ला मोबाईल एसएमएस व्‍दारे प्राप्‍त होण्‍यासाठी शेतक-यांनी कृषि विभागाशी संपर्क साधावा, असे आवाहन यावेळी करण्‍यात आले. दोन दिवस चालणा-या प्रशिक्षणात सोयाबीन, कापुस, तुर व हरभरा आदी पिकांचे लागवड तंत्रज्ञान, किड व रोग व्‍यवस्‍थापन, अन्‍नद्रव्‍य व्‍यवस्‍थापन, तण व्‍यवस्‍थापन आदी विषयावर विद्यापीठ शास्‍त्रज्ञ मार्गदर्शन करणार आहेत. कार्यक्रम यशस्‍वतीतेसाठी डॉ बी व्‍ही भेदे, डॉ ए जी बडगुजर, डॉ कुलधर, शिवलाड, अनिलराव आदींनी परिश्रम घेतले. कार्यक्रमास कृषि विभाग व विद्यापीठाचे अधिकारी व कर्मचारी मोठया संख्‍येने उपस्थित होते.
मार्गदर्शन करतांना प्रभारी कुलगुरू मा डॉ अशोक ढवण

Sunday, June 21, 2015

वनामकृवित आयोजित आंतरराष्ट्रीय योगदिनाच्या कार्यक्रमास मोठा प्रतिसाद

एक हजार जणांनी नोंदविला सहभाग

कार्यक्रमात प्रभारी कुलगुरू मा डॉ अशोक ढवण मार्गदर्शन करतांना
वसंतराव नाईक मराठवाडा कृषि विद्यापीठाच्‍या कृषि महाविद्यालयाच्‍या प्रागंणात आंतरराष्‍ट्रीय योगदिनाचे आयोजन करण्‍यात आले होते. याप्रसंगी विद्यापीठाचे आरोग्‍य अधिकारी डॉ सुब्‍बाराव व योग शिक्षक प्रा दिनकर जोशी यांच्‍यासह आर्ट ऑफ लिव्हिंगचे प्रशिक्षकांच्‍या मार्गदर्शनानुसार विविध आसन, प्राणायाम आदीचे सामुदायिकरित्‍या साधारणत: एक हजार जणांनी प्रात्‍यक्षिके केली. याप्रसंगी प्रभारी कुलगुरू मा डॉ अशोक ढवण, संशोधन संचालक डॉ दत्‍तप्रसाद वासकर, प्राचार्य डॉ धर्मराज गोखले, प्राचार्य डॉ विलास पाटील, प्राचार्य डॉ उदय खोडके, प्राचार्य प्रा विशाला पटणम, प्राचार्य डॉ पी एन सत्‍वधर आदींची प्रमुख उपस्थिती होती. याप्रसंगी मागदर्शन करतांना प्रभारी कुलगुरू मा डॉ अशोक ढवण म्‍हणाले की, आंतरराष्‍ट्रीय योग दिनाच्‍या माध्‍यमातुन भारतीय संस्‍कृती सर्व देशात पोहजली असुन योग हे भारताने जगाला दिलेली अनमोल देणगी आहे. योगाव्‍दारे जगात शांतता व समृध्‍दी नांदेल. आंतरराष्‍ट्रीय योग दिनानिमित्‍त योग मर्यादीत न राहता योग हा सर्वाच्‍या जीवनपध्‍दतीचा अविभाज्‍य भाग व्‍हावा, असे प्रतिपादन त्‍यांनी केले. कार्यक्रमाचे प्रास्‍ताविक विद्यार्थी कल्‍याण अधिकारी डॉ महेश देशमुख यांनी केले. सुत्रसंचालन डॉ आशाताई देशमुख यांनी तर आभार प्रदर्शन जी बी उबाळे यांनी केले. कार्यक्रम यशस्‍वीतेसाठी क्रीडाधिकारी प्रा जी ए गुळभिळे, प्रा डि एफ राठोड, प्रा शाहु चव्‍हाण यांच्‍यासह विविध महाविद्यालयाचे रासेयोचे कार्यक्रमाधिकारी व स्‍वयंसेवक, ग्रामीण कृषी कार्यानुभव कार्यक्रमाचे कार्यक्रमाधिकारी, कृषिदुत व कृषिकन्‍या यांनी परिश्रम घेतले. कार्यक्रमास विविध महाविद्यालयाचे विद्यार्थ्‍यी-विद्यार्थ्‍यींनी, अधिकारी, कर्मचारी आदी मोठया संख्‍येने उपस्थित होते.



Friday, June 19, 2015

गोडजेवनाच्‍या कार्यक्रमात शेतकरी मेळावा

कावलगांवच्‍या शेतक-यांनी समाजापुढे ठेवला आदर्श

पुर्णा तालुक्‍यातील कावलगांवचे शेतकरी शिवाजीराव पिसाळ यांच्‍या मातोश्री कै गिरजाबाई केरबाजी पिसाळ यांच्‍या गोडजेवनाचा कार्यक्रम दि १७ जुन रोजी होता. यानिमित्‍त भजन व किर्तनाचा कार्यक्रम न ठेवता, गांवातील शेतक-यांचे कृषि तंत्रज्ञानाबाबत प्रबोधन व्‍हावे म्‍हणुन शेतकरी मेळावयाचे आयोजन करण्‍यात आले. यात वसंतराव नाईक मराठवाडा कृषि विद्यापीठाचे विस्‍तार कृषि विद्यावेत्‍ता डॉ यु एन आळसे यांनी पुढाकार घेऊन मार्गदर्शन केले. कार्यक्रमाच्‍या अध्‍यक्षस्‍थानी विविध कार्यकारी सेवा संस्‍थेचे चेअरमन मारोतराव पिसाळ होते तर शिवसांब देशमुख, सरपंच शंकररावजी पिसाळ यांची प्रमुख उपस्थिती होती. या नाविण्‍यपुर्ण उपक्रमाचे परिसरातील शेतकरी मोठया संख्‍येने उपस्थित होते. यावेळी मार्गदर्शन करतांना डॉ यु एन आळसे म्‍हणाले की, शेतक-यांनी शेती पुरक व्‍यवसाय म्‍हणुन प्रत्येक दोन संकरित गाईची जोपासना करावी जेणे करून शेतीला सेंद्रिय खत, मुलांना दुध व रोज खर्चास पैसाची तरतुद होऊन शेतक-यांना आर्थिक स्‍थैर्य मिळेल. तसेच आंतरपिक पध्‍दतीचा अवलंब करून शेतीत शाश्‍वतता निर्माण करावी व कापुस लागवड करतांना नॉन बीटीच्‍या बियांची सभोवताली लागवड करून पर्यावरणाचे संतुलन राखावे, असा सल्‍लाही त्‍यांनी दिला. कार्यक्रमाचे सुत्रसंचालन सुभाषराव पिसाळ यांनी केले. या नाविण्‍यपुर्ण उपक्रमाच्‍या माध्‍यमातुन समाजापुढे एक आदर्श ठेवल्‍याबाबत शिवाजीराव पिसाळ व डॉ यु एन आळसे यांचे परिसरांतील शेतक-यांनी कौतुक केले. 

Tuesday, June 16, 2015

शेतक-यांनी विद्यापीठ विकसीत कमी खर्चाच्‍या तंत्रज्ञानाचा अवलंब करावा....... प्रभारी कुलगुरू मा डॉ अशोक ढवण

अखिल भारतीय समन्‍वीत कोरडवाहु शेती संशोधन प्रकल्‍पातर्फे आयोजित शेतकरी मेळाव्‍यात प्रतिपादन

बदलत्‍या हवामानामुळे शेतक-यांपुढे अनेक समस्‍या निर्माण होत असुन शेतक-यांनी कोरडवाहु शेतीतील जोखीम कमी करण्‍यासाठी विद्यापीठ विकसीत कमी खर्चाचे तंत्रज्ञानाचा अवलंब करावा. एक पीक पध्‍दतीपेक्षा आंतरपीक पध्‍दतीमुळे शेतीत जोखीम कमी होईल. असे प्रतिपादन वसंतराव नाईक मराठवाडा कृषी विद्यापीठाचे प्रभारी कुलगुरू मा. डॉ अशोक ढवण यांनी केले.
   वसंतराव नाईक मराठवाडा कृषि विद्यापीठातील अखिल भारतीय समन्‍वीत कोरडवाहु शेती संशोधन प्रकल्‍पातर्फे हवामान बदलानुरूप राष्‍ट्रीय उपक्रमार्तंगत खरीप पुर्व नियोजन व शेतकरी मेळाव्‍याचे दि 16 जुन रोजी आयोजन करण्‍यात आले होते, या मेळाव्‍याच्‍या अध्‍यक्षस्‍थानावरून ते बोलत होते. हवामान बदलाच्‍या पार्श्‍वभुमीवर विद्यापीठ विकसीत तंत्रज्ञान व किफायतशीर कोरडवाहु शेती तंत्रज्ञानाचा प्रसार व्‍हावा यादृष्‍टीने या मेळाव्‍याचे आयोजन करण्‍यात आले होते. याप्रसंगी व्‍यासपीठावर संशोधन संचालक डॉ. दत्‍तप्रसाद वासकर, कुलसचिव डॉ. दिनकर जाधव, प्राचार्य डॉ. धर्मराज गोखले, मुख्‍यशास्‍त्रज्ञ डॉ. बी. व्‍ही. असेवार, प्रगतशील शेतकरी श्री. विठ्ठलराव पारधे, श्री. ज्ञानोबा पारधे यांची प्रमुख उपस्थिती होती.
प्रभारी कुलगुरू मा. डॉ अशोक ढवण पुढे म्‍हणाले की, सोयाबीन पीकामध्‍ये शक्‍यतो रूंद वरंबा व सरी पध्‍दतीने पेरणी करावी, एकात्मिक अन्‍नद्रव्‍य व्‍यवस्‍थापन करून योग्‍य खतांची मात्रा पिकांना दयावी, जेणे करून अनावश्‍यक खतांवरील खर्च कमी करता येईल.
संशोधन संचालक डॉ. दत्‍तप्रसाद वासकर आपल्‍या भाषणात म्‍हणाले की, शेतक-यांनी विहीर व कुपनलीका पुर्नभरण तंत्रज्ञानाचा अवलंब करावा, मुख्‍य पीकासोबतच बांधावर देखील शेवगा, कडीपत्‍ता याचे पीक घेऊन उत्‍पन्‍नाचे स्‍त्रोत वाढवावेत असा सल्‍ला दिला. कुलसचिव डॉ. दिनकर जाधव यांनी पीकांना संरक्षीत सिंचनाची सोय करावी जेणे करून पाऊसाचा खंड पडल्‍यास त्‍याचा उपयोग करता येईल असे सांगितले. प्राचार्य डॉ. धर्मराज गोखले यांनी कोरडवाहु शेतीमध्‍ये शेतकरी बांधवांनी पेरणीची योग्‍य वेळ व योग्‍य पध्‍दतीचा अवलंब करण्‍याचे आवाहन केले.
याप्रंसगी विद्यापीठ विकसीत सोयाबीन, तुर, मुग, उडीद आदी पिकांच्‍या बियाण्‍याचे वितरण मान्‍यवरांच्‍या हस्‍ते करण्‍यात आले. पुरस्‍कार प्राप्‍त शेतकरी श्री ज्ञानोबा पारधे यांचा प्रभारी कुलगुरू डॉ. अशोक ढवण यांचे हस्‍ते सत्‍कार करण्‍यात आला.
कोरडवाहु शेती संशोधन केंद्रातर्फे सलग तिस-या वर्षी हा उपक्रम परभणी तालुक्‍यातील बाभळगांव येथे राबविण्‍यात येत असलेल्‍या उपक्रमामुळे शेतक-यांना लाभ होत असल्‍याचे शेतकरी श्री गिरीष पारधे व श्री बाबाराव पारधे यांनी मनोगत सांगितले. मुख्‍य शास्‍त्रज्ञ डॉ. बी.व्‍ही. आसेवार यांनी प्रास्‍ताविकात योजनेची उदिष्‍टे सांगुन शेतक-यांच्‍या गरजेनुसार संशोधन कार्याबाबत व कोरडवाहु शेतीसाठी एकात्मिक शेती पध्‍दती मॉडेल बाबत माहिती दिली.
तांत्रिक सत्रात प्रा. मदन पेंडके यांनी विहीर व कुपनलिका पुर्नभरण तर डॉ. आनंद गोरे यांनी सोयाबीन लागवड तंत्रज्ञान यावर माहिती दिली. कार्यक्रमास विविध संशोधन योजनांचे प्रमुख, प्राध्‍यापक अधिकारी, कर्मचारी, शेतकरी विद्यार्थी मोठया संख्‍येने उपस्थित होते. सुत्रसंचालन शास्‍त्रज्ञ डॉ. आनंद गोरे तर आभार प्रदर्शन मृदाशास्‍त्रज्ञ डॉ. गणेश गायकवाड यांनी केले. कार्यक्रम यशस्‍वीतेसाठी डॉ. मेघा सुर्यवंशी, श्रीमती सारीका नारळे, माणीक समीद्रे,  सय्यद जावेद, सुनिल चोपडे, भंडारे, चतुर कटारे आदींनी परिश्रम घेतले. 

Monday, June 15, 2015

वनामकृविचे प्रभारी कुलगुरू म्‍हणुन मा डॉ अशोक ढवण यांच्‍याकडे कार्यभार

वसंतराव नाईक मराठवाडा कृषि विद्यापीठाचे कुलगुरू मा डॉ बी व्‍यंकटेश्‍वरलु हे दि १५ जुन ते ३० जुन दरम्‍यान परदेश दौ-यावर गेले असुन या कार्यकाळात विद्यापीठाचे दैनंदिन कामकाज पाहण्‍यासाठी शिक्षण संचालक तथा अधिष्‍ठाता (कृषि) मा डॉ अशोक ढवण यांच्‍याकडे प्रभारी कुलगुरू पदाचा कार्यभार देण्‍यात आला आहे. 

Thursday, June 11, 2015

वनामकृविच्‍या कृषि अभियांत्रिकी व तंत्रज्ञान महाविद्यालयाच्‍या राष्‍ट्रीय सेवा योजनेस पुरस्‍काराचे तिहेरी मुकुट

राज्‍याचे उच्‍च व तंत्रशिक्षण मंत्री मा ना श्री विनोद तावडे यांच्‍या हस्‍ते पुरस्‍कार स्‍वीकारतांना प्राचार्य डॉ उदय खोडके, प्रा रविंद्र शिंदे, प्रा संजय पवार सोबत कुलगुरू मा डॉ तुकाराम मोरे.
...................................
वसंतराव नाईक मराठवाडा कृषि विद्यापीठांतर्गत असलेल्या परभणी येथील कृषि अभियांत्रिकी व तंत्रज्ञान महाविद्यालयाच्‍या राष्‍ट्रीय सेवा योजनेस महाराष्‍ट्र शासनाचा उत्कृष्ट महाविद्यालयाचा  पुरस्कार, रासेयोचे कार्यक्रमाधिकारी प्रा. रवींद्र शिंदे यांना उत्कृष्ट कार्यक्रम अधिकारी पुरस्कार तर विद्यार्थी रमाकांत कारेगांवकर यास उत्कृष्ट स्वयंसेवक पुरस्कारासाठी निवडी झाली होती. दि. ०८ जुन रोजी मुंबई येथील शाहीर अमरशेख सभागृहात एका सोहळयात उच्च व तंत्रशिक्षण मंत्री मा ना श्री विनोद तावडे यांच्या हस्ते हे पुरस्‍कार प्रदान करण्यात आले. प्राचार्य डॉ. उदय खोडके, कार्यक्रमाधिकारी प्रा रविंद्र शिंदे व प्रा संजय पवार यांनी हे पुरस्‍कार स्‍वीकारले. यावेळी राहुरी येथील महात्मा फुले कृषि विद्यापीठाचे कुलगुरू मा डॉ. तुकाराम मोरे व रासेयोचे राज्य संपर्क अधिकारी डॉ. अतुल साळुंखे यांची प्रमुख उपस्थिती होती.
कृषि अभियांत्रिकी महाविद्यालाने राष्‍ट्रीय सेवा योजनेंतर्गत अनेक सामाजिक उपक्रम यशस्‍वीपणे राबविली यात परिसर स्वच्छता अभियान, वृक्षारोपण, अंधश्रध्‍दा निर्मुलन, गाजरगवत निर्मुलन, व्यसनमुक्ती, एड्स जनजागृती, रस्ता सुरक्षा अभियान, इंधन बचत, शेतीविषयक नवनवीन तंत्र, औजारांच्या वापराबाबत शेतकरी बांधवाना मार्गदर्शन समावेश असुन यावर्षी शेतकरी बांधवाना दुष्‍काळ परिस्थितीस धैर्याने तोंड देण्‍यासाठी विद्यापीठातर्फे राबविण्‍यात येत असलेल्‍या ‘उमेद’ कार्यक्रमांतर्गत या रासेयोने पथनाटय व प्रभातफेरीच्‍या माध्‍यमातुन विशेष कार्य केले, यासर्व बाबींची दखल घेत, नि:स्वार्थ भावनेने व निष्ठेने समाजाची सेवा कार्याचा यथोचित गौरव व्हावा यासाठी राज्यस्तरीय निवड समितीच्या शिफारसीनुसार ही निवड करण्‍यात आली.
या यशाबद्दल कुलगुरू मा. डॉ. बी. व्यंकटेश्‍वरलू, खासदार मा श्री संजय जाधव, आमदार मा डॉ. राहुल पाटील, आमदार मा श्री विक्रम काळे, विद्यापीठ कार्यकारी परिषद सदस्य आमदार मा श्री सतीश चव्हाण, मा. श्री रवींद्र पतंगे, शिक्षण संचालक डॉ. अशोक ढवन, विस्तार शिक्षण संचालक डॉ. बी. बी. भोसले, कुलसचिव डॉ. दिनकर जाधव, विद्यार्थी कल्‍याण अधिकारी डॉ महेश देशमुख आदींनी अभिनंदन केले.

Wednesday, June 10, 2015

वाई येथील आदिवासी शेतक-यांचे शेती उत्‍पादन वाढीसाठी विद्यापीठ विविध उपक्रम राबविणार.......कुलगुरू मा डॉ बी व्‍यंकटेश्‍वरलु

वनामकृविच्‍या आदिवासी शेतकरी मेळावास मोठा प्रतिसाद
आदिवासी शेतकरी मेळाव्‍यात मार्गदर्शन करतांना कुलगुरू मा डॉ बी व्‍यंकटेश्‍वरलु, व्‍यासपीठावर कार्यकारी परिषदेचे सदस्‍य मा श्री रविंद्र पतंगे, संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ बी बी भोसले, कुलसचिव डॉ दिनकर जाधव, संरपचा कविताताई दुधाळकर, डॉ अशोक कडाळे आदी
आदिवासी शेतकरी मेळाव्‍यात विद्यापीठ विकसित सोयाबीन बियाणे व कृषी दैनंदिनीचे वाटप करतांना कुलगुरू मा डॉ बी व्‍यंकटेश्‍वरलु, सोबत कार्यकारी परिषदेचे सदस्‍य मा श्री रविंद्र पतंगे, संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ बी बी भोसले, कुलसचिव डॉ दिनकर जाधव, संरपचा कविताताई दुधाळकर, डॉ अशोक कडाळे आदी
आदिवासी शेतकरी मेळाव्‍यात मार्गदर्शन करतांना विद्यापीठ कार्यकारी परिषदेचे सदस्‍य मा श्री रविंद्र पतंगे, व्‍यासपीठावर कुलगुरू मा डॉ बी व्‍यंकटेश्‍वरलु, संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ बी बी भोसले, कुलसचिव डॉ दिनकर जाधव, संरपचा कविताताई दुधाळकर, डॉ अशोक कडाळे आदी
..............................
आदिवासी शेतक-यांचा आर्थिकस्‍तर उंचावणे ही एक अविरत प्रक्रिया असुन विद्यापीठाने वाई हे आदिवासी गांव दत्‍तक घेऊन गेल्‍या दिड वर्षात आदिवासी उपयोजनेतंर्गत शेती उत्‍पादन वाढीसाठी अनेक कार्यक्रम घेतले, त्‍यास आदिवासी शेतक-यांनीही मोठया प्रतिसाद दिला. या पुढेही विविध उपक्रमांच्‍या माध्‍यमातुन आदिवासी शेतक-यांसाठी विद्यापीठ कार्य करील, असे प्रतिपादन कुलगुरू मा डॉ बी व्‍यंकटेश्‍वरलु यांनी केले.
वसंतराव नाईक मराठवाडा कृषि विद्यापीठातील अखिल भारतीय समन्‍वयीत सिंचन पाणी व्‍यवस्‍थापन संशोधन प्रकल्‍पाच्‍या वतीने हिंगोली जिल्‍हयातील आदिवासीबहुल वाई या गावात आदिवासी उपयोजना राबविण्‍यात येत असुन या योजनेंतर्गत आदिवासी शेतकरी मेळाव्‍याचे आयोजन दि १० जुन रोजी करण्‍यात आले होते, त्‍यावेळी ते बोलत होते. याप्रसंगी व्‍यासपीठावर विद्यापीठ कार्यकारी परिषदचे सदस्‍य मा श्री रविंद्र पतंगे, संशोधन संचालक डॉ दत्‍तप्रसाद वासकर, विस्‍तार शिक्षण संचालक डॉ बी बी भोसले, कुलसचिव डॉ दिनकर जाधव, वाई गांवच्‍या संरपच कविताताई दुधाळकर, मुख्‍य शास्‍त्रज्ञ डॉ अशोक कडाळे उपस्थित होते.
कुलगुरू मा डॉ बी व्‍यंकटेश्‍वरलु पुढे म्‍हणाले की, पुढील वर्षी वाई गावात विद्यापीठाच्‍या मार्गदर्शनाखाली ग्रामबिजोत्‍पादन घेण्‍यात येईल. तसेच विद्यापीठ शेतक-यांसाठी शेती पुरक जोडधंदाविषयी तांत्रिक माहिती पुरवील. आज पाणीचा प्रश्‍न अत्‍यंत गंभीर झाला असुन आदिवासी शेतक-यांनी देखिल आपल्‍या शिवारातील भुजल पातळी वाढण्‍यासाठी प्रयत्‍न करावेत. विद्यापीठ वाई गावातील काही निवडक विहिर व बोरवेलचे पुनर्भरण प्रात्‍यक्षिक स्‍वरूपात करून देईल. प्रत्‍येक आदिवासी शेतक-यांनी माती परिक्षण करूनच पीक नियोजन करावे, यासाठी विद्यापीठाचे फिरते माती प्रयोगशाळेची सेवा देण्‍यात येईल, असे आश्‍वासन त्‍यांनी यावेळी दिले.
कार्यकारी परिषदचे सदस्‍य मा श्री रविंद्र पतंगे आपल्‍या मार्गदर्शनात म्‍हणाले की, कुलगुरूच्‍या नेतृत्‍वखाली विद्यापीठाने नियोजनबध्‍द पध्‍दतीने आदिवासी उपयोजनेंतर्गत वाई या गांवी सुधारित कृषी तंत्रज्ञान पोहोचविले असुन त्‍यांचे निश्चितच चांगले परिणाम पहावयास मिळत आहेत. आदिवासी शेतक-यांत पीक उत्‍पादन वाढीसाठी स्‍पर्धात्‍मक वातावरण निर्मितीसाठीही विद्यापीठाने प्रयत्‍न करावेत, असे मत त्‍यांनी व्‍यक्‍त केले.   
संशोधन संचालक डॉ दत्‍तप्रसाद वासकर आपल्‍या भाषणात म्‍हणाले की, आदिवासी उपयोजनेमुळे आदिवासी शेतक-यांशी विद्यापीठाची नाळ घट झाली असुन येणा-या खरिप हंगामात वाई गांवातील शेतक-यांना लागणारे तांत्रिक मार्गदर्शन करण्‍यात येईल.
विद्यापीठाचे तंत्रज्ञान वाई सारख्‍या दुर्गम आदिवासी भागात या योजनेमुळे पोहचले असुन आदिवासी शेतक-यांनी कमी खर्चाचे विद्यापीठाचे तंत्रज्ञानाचा अवलंब करावा, असे मत विस्‍तार शिक्षण संचालक डॉ बी बी भोसले यांनी यावेळी व्‍यक्‍त केले तर कुलसचिव डॉ दिनकर जाधव आपल्‍या भाषणात म्‍हणाले की, आदिवासी शेतक-यांनी विविध योजनेचा फायदा घेऊन स्‍वावलंबी व्‍हावे, मोफत शेती निविष्‍ठापेक्षा तंत्रज्ञान महत्‍वाचे असुन त्‍यांचा योग्‍य तो वापर करावा.
वाई गांवाचे आदिवासी शेतकरी हरिभाऊ दुधाळकर यांनी मनोगत व्‍यक्‍त केले. याप्रसंगी मान्‍यवरांच्‍या हस्‍ते मेळाव्‍यात वाई या गांवातील निवडक आदिवासी शेतक-यांना विद्यापीठ विकसित सोयाबीन बियाणे व कृषि दैनंदिनीचे वाटप करण्‍यात आले. मेळाव्‍यात सोयाबीन लागवड तंत्रज्ञानावर डॉ एस पी म्‍हेत्रे यांनी, तण व्‍यवस्‍थापनावर डॉ अशोक जाधव यांनी तर सोयाबीन पीकातील किड व्‍यवस्‍थापन यावर डॉ दयानंद मोरे यांनी मार्गदर्शन केले.
कार्यक्रमाच्‍या प्रास्‍ताविकात डॉ अशोक कडाळे यांनी आदिवासी उपयोजनेंतंर्गत राबविण्‍यात येत असलेल्‍या विद्यापीठाच्‍या कार्याची माहिती दिली. कार्यक्रमाचे सुत्रसंचालन डॉ गजानन गडदे यांनी तर आभार प्रदर्शन डॉ यु एन कराड यांनी केले. कार्यक्रम यशस्‍वीतेसाठी एन के गिराम, देवेंद्र कुरा, दादाराव भरोसे, एकनाथ कदम, बी एस कांबळे आदींनी परिश्रम घेतले. कार्यक्रमास वाई गांवचे दोनशे आदिवासी शेतकरी, विद्यापीठातील अधिकारी व कर्मचारी मोठया संख्‍येने उपस्थित होते.


Tuesday, June 9, 2015

मोसंबीवरील डिंक्‍या रोग्‍याच्‍या व्‍यवस्‍‍थापनासाठी बोर्डोपेस्‍ट लावा......कृषि शास्‍त्रज्ञ डॉ.डी. डी निर्मल

वसंतराव नाईक मराठवाडा कृषि विद्यापीठाच्‍या विस्‍तार शिक्षण संचालनालयाच्‍या लिंबुवर्गीय फळपिकांवर मराठवाडयाकरिता तंत्रज्ञान अभियानातंर्गत नांदेड जिल्‍हातील मौजे ढोकी येथे दिनांक ६ जुन रोजी मोसंबी बागायतदारांचे प्रशिक्षण वर्गाचे आयोजन करण्‍यात आले होते. या प्रशिक्षण कार्यक्रमाच्‍या अध्‍यक्षस्थानी गांवचे सरपंच बी जी डाखोरे हे होते तर अभियानाचे प्रभारी अधिकारी डॉ डी डी निर्मल, तालुका कृषि अधिकारी डी. आर. राजेवार, विषय विशेषज्ञ डॉ. देविकांत देशमुख, सेवा सहकारी सोसायटीचे चेअरमन जी.एम.लबडे, कृषी पर्यवेक्षक जी. यु. लोखंडे, आत्‍माचे तालुका तंत्र व्‍यवस्‍थापन सी. डी. कदम, कृषी पर्यवेक्षक एस. एम. करंजकर, पर्यवेक्षक जी. पी. वाघोळे, एन. डी. कवठे आदीं उपस्थित होत. हे अभियान कुलगुरु मा डॉ. बी. व्‍यंकटेश्‍वरलू यांच्‍या मार्गदर्शनाखाली व विस्‍तार शिक्षण संचालक डॉ. बी. बी. भोसले यांच्‍या अधिनिस्‍त विद्यापीठाच्‍या वतीने मराठवाडयात राबविण्‍यात येत आहे. 
प्रशिक्षणात मार्गदर्शन करतांना वनस्‍पती विकृती शास्‍त्रज्ञ डॉ. डी. डी. निर्मल म्‍हणाले की, मोसंबी बागेचे डिंक्‍या, सिट्रस ग्रिनीग व सिट्रस ट्रिस्‍टीझा या  िंक्‍या ोरा   िक्षण रोगांमुळे  मोठया प्रमाणावर नुकसान होते, डिंक्‍या रोग हा फायटोप्‍थोरा बुरशीमुळे होतो, या रोगाच्‍या नियंत्रणासाठी मोसंबीच्‍या झाडांना दरवर्षी बोर्डोपेस्‍ट लावावी. तर शास्‍त्रज्ञ डॉ.एस.पी.चव्‍हाण आपल्‍या भाषणात म्‍हणाले की, शेतक-यांनी रोगमुक्‍त निरोगी रोपांची लागवड करून मोसंबी बागेचे शास्‍त्रशुध्‍द व्‍यवस्‍थापन केल्‍यास अधिक उत्‍पादन मिळु शकते. शास्‍त्रज्ञ डॉ.पी.एम.सांगळे यांनी मोसंबीवरिल विविध किडांच्‍या व्‍यवस्‍थापनाचे उपाय सुचविले तसेच प्रा. यु. व्‍ही. सातपुते यांनी मोसंबी बागेसाठी जमिनीची निवड खत व्‍यवस्‍थापन याविषयी तर प्रा. यु. के. भोगिल यांनी मोसंबी बागेसाठी पाणी व्‍यवस्‍थापन यावर मार्गदर्शन केले.
याप्रसंगी शेतकरी रमेश लबडे व वामनराव जाधव यांनी मनोगत व्‍यक्‍त केले. कार्यक्रमाचे सुत्रसंचालन प्रा.डी.डी. आगलावे यांनी केले. कार्यक्रम यशस्‍वीतेसाठी गंगाधर ल‍बडे, सुदर्शन बोराडे, अमोल धाडगे आदींनी परिश्रम घेतले. कार्यक्रमासाठी नांदेड तालुक्‍यातील मोसंबी बागायतदार मोठया संख्‍येने उपस्थित होते.

Monday, June 8, 2015

वनामकृविच्‍या कृषि विद्या विभागातील पदव्‍युत्‍तर विद्यार्थ्‍यांना निरोप


वसंतराव नाईक मराठवाडा कृषि विद्यापीठाच्‍या कृषि विद्या विभागातील पदव्‍युत्‍तर विद्यार्थ्‍यांना दिनांक ६ जुन रोजी विभागाच्‍या वतीने निरोप देण्‍यात आला. कार्यक्रमाच्‍या अध्‍यक्षस्‍थानी संचालक शिक्षण तथा अधिष्‍ठाता डॉ. अशोक ढवण हे होते तर कृषि महाविद्यालयाचे सहयोगी अधिष्‍ठाता डॉ. धर्मराज गोखले प्रमुख पाहुणे म्‍हणुन उपस्थित होते तर प्राध्‍यापक डॉ. आनंद कारले व विद्यार्थी कल्‍याण अधिकारी डॉ. महेश देशमुख यांची प्रमुख उपस्थिती होती.
यावेळी मार्गदर्शन करतांना शिक्षण संचालक डॉ. अशोक ढवन म्‍हणाले की, विद्यार्थ्‍यांनी आपली आवड व क्षमता ओळखुन करियरची निवड करावी व स्‍वत:चे भवितव्‍य घडवावे. कृषि उच्‍च शिक्षणाच्‍या व स्‍पर्धा परीक्षेच्‍या माध्‍यमातुन आज अनेक संधी कृषि पदवीधरांना उपलब्‍ध असुन विद्यार्थ्‍यांनी सकारत्‍मक दृष्‍टीकोन ठेवुन परिश्रम घ्‍यावे, यश तुम्‍हचेचे आहे.
प्रमुख पाहुणे सहयोगी अधिष्‍ठाता डॉ. धर्मराज गोखले म्‍हणाले की, कृषि विद्या विभागाच्‍या विद्यार्थ्‍यांना भविष्‍यात खुप मोठ्या संधी असुन केंद्रीय व राज्‍य सेवा परिक्षा, बॅकींग, कृषि क्षेत्रातील इतर स्‍पर्धात्‍मक परिक्षेचा जोमाने अभ्‍यास करा. त्‍यासाठी लागणारी आवश्‍यक ती सर्व मदत देण्‍यात येईल.

कार्यक्रमाचे प्रास्‍ताविकात डॉ. आनंद कारले यांनी केले. कार्यक्रमाचे सुत्रसंचालन प्रकाश ठाकरे यांनी व आभार प्रदर्शन श्रीकृष्‍णा वारकड यांनी केले. या कार्यक्रमास विभागाचे डॉ. व्हि. बी. अवसरमल, डॉ. मिर्झा आय.ए.बी., डॉ. डी.सी.लोखंडे, प्रा. डि. एफ. राठोड सह विद्यार्थ्‍यी विजय मुगीलवार, संदिप बिबे, ज्ञानेश्‍वर गवळी, माधव टाले, रवी गित्‍ते, अनिल जाधव, मोरश्‍वर राठोड, शिला शिंदे, ललिता वर्मा, खानी देबरमा व विभागाचे कर्मचारी उपस्थित होते. कार्यक्रम यशस्‍वीतेसाठी विभागातील प्रथम वर्षातील विद्यार्थ्‍यांनी पुढाकार घेतला.

Saturday, June 6, 2015

जमीनीचे आरोग्य तपासणीसाठी माती परीक्षण गरजेचे.......आमदार मा मोहनराव फड

वसंतराव नाईक मराठवाडा कृषि विद्यापीठाच्या मृद विज्ञान व कृषि रसायनशास्‍त्र विभाग मार्फत व रामेटाकळी ग्रामपंचायत यांच्‍या संयुक्‍त विद्यमाने दिनांक १ जुन रोजी माती परीक्षण शिबीर व शेतकरी मेळाव्‍याचे रामेटाकळी येथे आयोजन करण्‍यात आले होते. कार्यक्रमाच्‍या अध्‍यक्षस्‍थानी आमदार मा श्री मोहनराव फड हे होते तर विभाग प्रमुख डॉ विलास पाटील, डॉ हरिहर कौसडीकर, ग्रामपंचायत पदाधिकारी व प्रगतशील शेतकरी उपस्थित होते.
यावेळी आमदार मा श्री मोहनराव फड मार्गदर्शन करतांना म्‍हणाले की, माती परीक्षण म्‍हणजेच जमीनीचे आरोग्‍य तपासणी असुन प्रत्‍येक शेतक-यांनी माती परिक्षण करूनच खरिप पीकांचे नियोजन करावे, विद्यापीठाच्‍या फिरत्‍या माती परीक्षण प्रयोगशाळेच्‍या माती परीक्षण उपक्रम शेतक-यांसाठी अत्‍यंत उपयुक्‍त असुन शेतक-यांनी याचा लाभ घ्‍यावा. विभाग प्रमुख तथा मृदाशास्‍त्रज्ञ डॉ. विलास पाटील आपल्‍या मार्गदर्शनात म्‍हणाले की, माती परीक्षण ही शेतक-यांची एक मुलभूत गरज असुन याच्‍या आधारेच पिकांना एकात्मिक अन्‍नद्रव्‍य व्‍यवस्‍थापन करावे. जमिनीच्‍या आरोग्‍याचे महत्‍व स्‍पष्‍ट करून शेतक-यांच्‍या बांधावर जाऊन माती परीक्षण उपक्रमाबद्ल सविस्‍तर मार्गदर्शन केले तर डॉ. हरिहर कौसडीकर यांनी पिक पोषण व सुक्ष्‍म अन्‍नद्रव्‍य व्‍यवस्‍‍थापनाबाबत मार्गदर्शन केले.
याप्रसंगी फिरती माती प्रयोगशाळे तर्फे रामेटाकळी परीसरातील शेतक-यांचे १५० मातीचे नमुने गोळा करण्‍यात आले. कार्यक्रम यशस्‍वीतेसाठी मृद विज्ञान विभागातील पर्यवेक्षक जावेद जानी, पदव्‍युत्‍तर विदयार्थी फुलमाळी, जाधव, खोकले, शिनगारे तसेच रामेटाकळी ग्रामस्‍थ कापसे, रामराव कदम, स्‍वामी गिरी यांनी परिश्रम घेतले. मेळाव्‍यास शेतकरी बांधव मोठया संख्‍येने उपस्थित होते.

Monday, June 1, 2015

वनामकृविच्‍या २७ शिफारशींना संयुक्त कृषि संशोधन व विकास समितीच्या बैठकीत मान्यता

वनामकृविच्‍या २०१४-१५ सालातील संशोधन कार्याची फलश्रुती
महाराष्‍ट्रातील चारही कृषी विद्यापीठांनी केलेले संशोधन शेतक-यांपर्यत पोहोचविण्‍यासाठी महत्‍वाचा टप्‍पा मानल्‍या जाणा-या संयुक्‍त कृषि संशोधन आणि विकास समितीची ४३ वी बैठक राहुरी (जि. अहमदनगर) येथील महात्‍मा फुले विद्यापीठात दिनांक २८ ते ३० मे या कालावधीत संपन्‍न झाली. तीन दिवस चाललेलया शास्‍त्रज्ञांच्‍या या बैठकीत राज्‍यातील चारही कृषी विद्यापीठांच्‍या विविध शिफारशींना मान्‍यता देण्‍यात आली. यात वसंतराव नाईक मराठवाडा कृषि विद्यापीठच्‍या एकुण २७ शिफारशींना मान्‍यता देण्‍यात आली असुन यात  विविध पीकांची पाच वाण, एक शेती यंत्र आणि इतर २१ पीक उत्‍पादक तंत्रज्ञानावर आधारीत शिफारशी पारित करण्‍यात आल्‍या आहेत.
खरीप ज्‍वारीचा एसपीएच-१६४१ वाणास मान्‍यता
वनामकृविने विकसित केलेल्‍या खरीप ज्‍वारीचा एसपीएच-१६४१ हा संकरीत वाण महाराष्‍ट्र राज्‍यातील खरीप ज्‍वारी लागवडीखालील क्षेत्रासाठी प्रसारीत करण्‍याची शिफारस करण्‍यात आली. हा वाण तुल्‍य वाणांपेक्षा उत्‍पादनात सरस आढळुन असुन काळी बुरशी, खोड माशी व खोड किडीस प्रतीकारकक्षम आहे.



भाताच्‍या पीबीएनआर ०३-२ वाणास मान्‍यता
या पेरसाळ वाणाचे पराग व आविष्‍कार या तुल्‍य वाणांपेक्षा अधिक उत्‍पादन व दाण्‍यांचा आकार लांबट असल्‍यामुळे या वाणाची मराठवाडा विभागामध्‍ये ओलीताखाली पेरसाळीसाठी प्रसारीत करण्‍याची शिफारस करण्‍यात आली.

अमेरिकन कपाशीच्‍या एनएच-६३५ वाणास मान्‍यता
अमेरिकन कपाशीचा एनएच-६३५ हा सरळ वाण अधिक उत्‍पादन देणारा असुन धाग्‍याची उच्‍च गुणवत्‍ता, रस शोषण करणा-या किडी, अल्‍टरनेरीया व जीवाणुजन्‍य करपा या रोगांना सहनशील असल्‍याने महाराष्‍ट्र राज्‍यात कोरडवाहू लागवडीसाठी प्रसारीत करण्‍याची शिफारस मान्‍य करण्‍यात आली.




अमेरिकन कपाशीच्‍या एनएचएच-२५० वाणास मान्‍यता
अमेरिकन कपाशीच्‍या एनएचएच-२५० हा संकरीत वाण अधिक उत्‍पादन देणारा असुन धाग्‍याची उच्‍च गुणवत्‍ता, रसशोषण करणा-या किडी, अल्‍टरनेरीया व जीवानुजन्‍य करपा या रोगांना सहनशील असल्‍याने महाराष्‍ट्र राज्‍यात कोरडवाहु लागवडीसाठी प्रसारित करण्‍याची शिफारस करण्‍यात आली.


परभणी मिरची पीबीएनसी-१
परभणी मिरची पीबीएनसी-१ हा वाण हिरव्‍या मिरचीच्‍या अधिक उत्‍पादनासाठी मराठवाडा विभागामध्‍ये खरीप हंगामासाठी प्रसारीत करण्‍यात आला.




बैलचलित खत पसरणी यंत्र
वनामकृवि विकसित बैलचलित खत पसरणी यंत्राची शेणखत व तत्‍सम खते पसरविण्‍यासाठी व ५०० किलो क्षमता असलेली बैलगाडी म्‍हणुन प्रसरणासाठी शिफारस करण्‍यात आली.



या व्‍यतिरीक्‍त पीक उत्‍पादन तंत्रज्ञानावर आधारीत इतर २१ शिफारशी मान्‍य झाल्‍या

सौजन्‍य
डॉ. दत्‍तप्रसाद वासकर, संशोधन संचालक
डॉ. दिगंबर पेरके, संशोधन उपसंचालक
वसंतराव नाईक मराठवाडा कृषि विद्यापीठ, परभणी